المنصورة

السلام عليكم

النهاردة كنت في المنصورة بحضر مؤتمر قسم الباثولوجيا الإكلينيكية السنوي

دي تاني سنة بحضر فيها المؤتمر و هي برده تاني زيارة لي للمنصورة

أنا مش حتكلم عن المستوى العلمي و عن تنظيم المؤتمر، ده مش موضوع البوست ده خالص

أنا بس حتكلم عن حاجه واحده: كرم الضيافة

الأستاذ الدكتور رئيسة المؤتمر، و هي عالمة جليلة أيضا، حسن استقبالها و كرم ضيافتها مايتوصفوش

احنا كنا مسافرين في عربيتين من الأسكندرية، واحدة فيها أعضاء هيئة التدريس في كلية الطب و التانية اعضاء هيئة التدريس في معهد البحوث

الدكتورة بمجرد وصولنا قامت تستقبل كل الأشخاص و ترحب بينا واحد واحد و بتسجل أسامينا، الصغير قبل الكبير

أجلت بداية الجلسات لحد مالأساتذة إستريحوا و شربوا الشاي (رغم عدم حرفية التصرف بس محدش ينكر الذوق العالي)

معنا أستاذ متفرغ دايما مابيجيش رغم أنها بتوجهله دعوة شخصية سنويا، الحج ده شرف السنة دي معانا، الست في ثانية غيرت النظام و خلته أحد رؤساء الجلسة الإفتتاحية

و خلت رئيسة القسم بتاعنا رئيسة الجلسة الختامية رغم انها ماكنتش قايلة انها جاية

بعد الجلسات رفضت اننا نسافر من غير ما نتغدى كلنا غداء فاخر أشرفت عليه بنفسها و شمل كل الناس بما فيهم السواقين اللي معانا

أنا بقالي زمن ماشوفتش أستاذة كبيرة و عالمة جليلة و منظمة ممتازة و شخصية كريمة بالمنظر ده

أنا كنت فاكرة الناس دول انقرضوا بس الست دي بجد بجد أسعدتني

شكرا أهل المنصورة و لك جزيل الشكر و الإحترام و التقدير دكتورة إقبال