السلام عليكم
أنا معرفش فيه حد من حضرتكم معيد أو مدرس مساعد أو عضو هيئة تدريس في أي جامعة مصرية مبجلة ولا لأ، بس أكيد لو في حد حيبقى حاسس بالموضوع ده أوي
دلوقتي معروف إن الترقية في السلك الجامعي تتطلب رسائل و أبحاث و نشر علمي.............الخ و ذلك على حسب الدرجة العلمية، كل دة كلام جميل و كلام معقول مقدرش أقول حاجة عنه، بس فيه استخراع مصري بقاله كام سنة كدة اسمه دورات الترقية!! إيه الحكاية؟؟ ببساطة كدة كان فيه مشروع أوروبي هدفه تنمية قدرات أعضاء هيئة التدريس في الجامعات المصرية!! رحنا أخدنا الفلوس و بنوا بيها أماكن فخمة في المحافظات المختلفة و جهزوها بأجهزة كومبيوتر كتيرة أوي (معظمها طبعا علشان اللعب و الأغاني)، و عينولهم كام ألف موظف (من باب البطالة المقنعة) و عملوا نظام غبي يخلي الواحد ترقيتة تفضل متعلقة بعد مايخلص كل حاجة و تفضل واقفة لحد ما ياخد ست دورات متنوعة
حتقولولي و ماله؟ مش حاجات مفيدة علشان تنمية القدرات؟ لأ، ده مسمى بس علشان يضحكوا على الناس و يعذبوهم و يخدوا فلوسهم!! المفروض إن المشروع ده ليه تمويل خارجي كامل يشمل تكاليف الدوات و التجهيزات و الأوراق و حتى الشاي و الجاتوه!! مرة وحدة قالوا الفلوس خلصت! يبقى الواحد لازم يدفع علشان يترقى!! ماشي، و كمان مفيش جاتوه (مع العلم انهم كانوا بيجيبوا أنواع رديئة جدا علشان يوفروا على قد ميقدروا)، ماشي حنستحمل، بس على فكرة الدورات دي مش شغالة طول الوقت!! دي بالمزاج! يعني كل شوية ينزلوا جدول يالواحد يلاقي الدورات اللي هو عايزها في وقت مناسب ياميلاقيهاش و يخبط دماغة في الحيط!! أنا معايا واحدة بقالها سنة كاملة ترقيتها واقفة على الست دورات دول و الحمد لله خلصتهم الأسبوع اللي فات!! حاجة تانية، ممكن تروح لحد هناك في معاد الدورة تلاقيها اتلغت علشان المدرب إعتذر!! (المدرب ده بيبقى عضو هيئة تدريس جاي يتكلم خمس ساعات يوميا لمدة ثلاثة أيام متصلة في أي حاجة إن شالله كانت مناقشة عامة!! ملهاش أي علاقة بموضوع الدورة و بياخد كام ألف جنيه في الآخر)، أنا نسيت أقولكم ان محتوى الدورات دي نفخ و تافه و مالوش لازمة و هو عبارة عن تضييع وقت و خلاص
أحب أختم كلامي بقصة واقعية حدثت بالفعل في كواليس الدورات، في دكتورة بتدرس في بيروت، و كانت لازم تاحد الدورات النفخ دي، و كان ليها زمايل في لبنان برده ليهم نفس الظروف، تفتق ذهنهم انهم يتكفلوا بإقامة الدورات في بيروت!! قالوا انهم حيتحملوا مصاريف المكان و الدورة و تكاليف استضافة المدرب، و لما يقسموا المبلغ عليهم كان كل واحد حيدفع 1500 جنيه، قالوا مش مشكلة بس نخلص....قالولهم لأ يا حلوين!! تكاليف الدورات لو اتعملت في لبنان حتبقى 10000 جنيه !!!!!!! طبعا الناس لقوا انهم ييجوا من لبنان و يرجعوا ست مرات على كل دورة أوفر !!! الدكتورة اللي بتحكي قالت انها حجزت و جت على معاد دورة من الدورات لاقيتها اتلغت، قامت راجعة بيروت بخفي حنين !!!!!!!! عمار يا مصر
5 comments:
رغم انى مش فى هيئه تدريس لكن برضه ترقيتى واقفه لاسباب غريبه ..يعنى لا ماجستير و لا غيره يشفعوا و اى واحد واخد دبلومه على عشر سنين ممكن ياخد الترقيه..و يقولك بلد شهادات ...شهادات ايه و النبى
حاجه تقرف يا شيخه
مش عارف اقولك ايه .. مفيش حاجة بتؤخذ جد للنهاية . لازم الحاجة ترجع لاصولها وهو التهريج والاستعباط والاستهبال .. وزى ما بيقولوا فى الامثال الغربال الجديد له شدة ..عموما مفيش فايدة هم ستة دورات بالطول والعرض سوف يتم ابتلاكم بهم فصبرا يا محبى الترقى والله ولى التوفيق
mohra,
Hang on:)
وميض ابتسامة
آه، حنعمل ايه
نورتني
matfkrneeesh..i have to enroll in some sooon..and it's so time waste offfff
Epi,
Tadiee3 wa2t!! eah dah? mafeash ta2deer l ghood el dawla ma3akom abadan :D
Bel shefa isA
Post a Comment